2025-04-28

განცხადება ონაცემთა სუბიექტების მიმართ განხორციელებულ შესაძლო „ფიშინგის“ ფაქტებზე

---

გვსურს, საზოგადოებას მივაწოდოთ ინფორმაცია მონაცემთა სუბიექტების მიმართ განხორციელებულ შესაძლო „ფიშინგის“ ფაქტებზე.

„ფიშინგი“ კიბერ თავდასხმის ერთ-ერთი ფორმაა და მისი მიზანი მოტყუების გზით კომპიუტერულ მოწყობილობაზე მავნე პროგრამული უზრუნველყოფის გავრცელება ან/და კონფიდენციალური ინფორმაციის/პერსონალური მონაცემების მოპოვებაა.

კომერციული ბანკების სახელით გამოგზავნილი ელექტრონული ან/და მოკლე ტექსტური შეტყობინებით შესაძლოა თქვენი პირადი ანგარიშის დადასტურებას, ამ მიზნით კი - სპეციალურად „ფიშინგის“ მიზნით შექმნილ ბმულზე გადასვლასა და თქვენი პერსონალური მონაცემების მითითებას ითხოვდნენ. ამასთან, ბმულზე გადასვლისას თქვენთვის ხელმისაწვდომი ვებგვერდი, შესაძლოა კონკრეტული კომერციული ბანკის ოფიციალურ ვებგვერდთან მაქსიმალურად მიმსგავსებული იყოს.

პერსონალურ მონაცემთა დაცვის სამსახური მოგიწოდებთ, თავი შეიკავოთ ელექტრონული/მოკლე ტექსტური შეტყობინებებით მიღებული საეჭვო ბმულების გახსნისგან და თქვენი პერსონალური მონაცემების გაზიარებისგან. ამასთან, ბმულის გახსნის შემთხვევაში, დარწმუნდით ვებგვერდის სანდოობაში და მის ვიზუალურ მხარეს არ ენდოთ.